ഇത്രയും മാന്യനായ കള്ളൻ വേറെയില്ലന്ന് സോഷ്യൽ മീഡിയ; കത്തെഴുതി വെച്ച് കവർന്നത് 2.5 ലക്ഷം

ഇത്രയും മാന്യനായ കള്ളൻ വേറെയില്ലന്ന്  സോഷ്യൽ മീഡിയ സാക്ഷ്യപ്പെടുത്തുന്ന സംഭവം നടന്നത് മധ്യപ്രദേശിലെ ഖാർഗോണിൽ. ഒരു കട കൊള്ളയടിക്കാൻ കയറിയ കള്ളനാണ് ഇപ്പോൾ സമൂഹ മാധ്യമങ്ങളിൽ ചർച്ചയാവുന്നത്. കട ഉടമയോട് ക്ഷമ ചോദിച്ച് കൊണ്ട്  ഒരു ക്ഷമാപണക്കത്ത് കടയിൽ എഴുതി വച്ചതിന് ശേഷമാണ് ഇയാൾ 2.5 ലക്ഷം രൂപ കൊള്ളയടിച്ച് കടന്ന് കളഞ്ഞത്. സംഭവം സമൂഹ മാധ്യമങ്ങളിൽ ഉൾപ്പെടെ വാർത്തയായതോടെ ഇത് വല്ലാത്തൊരു ധാർമ്മിക ബോധമായിപ്പോയിയെന്നാണ് സമൂഹ മാധ്യമ ഉപയോക്താക്കൾ കുറിച്ചത്. ഇങ്ങനെയൊരു മാന്യനായ കള്ളൻ വേറെ കാണില്ലെന്നും നിരവധി പേർ  അഭിപ്രായപ്പെട്ടു.

കഴിഞ്ഞ 6 -ന് നടന്ന രാമനവമി ആഘോഷത്തിന് ഇടയിലാണ് ഈ മോഷണം നടന്നതെന്ന് റിപ്പോര്‍ട്ടുകൾ പറയുന്നു. ഖാർഗോണിലെ ജമീന്ദർ മൊഹല്ലയിലെ ജുജാർ ബൊഹ്‌റയുടെ കടയാണ് കൊള്ളയടിക്കപ്പെട്ടത്. തൊട്ടടുത്ത ദിവസം ബൊഹ്‌റ കട തുറന്നപ്പോൾ മാത്രമാണ് മോഷണം ശ്രദ്ധയിൽപ്പെട്ടത്. കടയിൽ നിന്നും കള്ളന്‍റെ ക്ഷമാപണക്കത്തും ഇദേഹത്തിന് ലഭിച്ചു. ഇത് ആദ്യമായല്ല ഈ കടയിൽ മോഷണം നടക്കുന്നത്. ഈദ് ദിനത്തിൽ നടന്ന മോഷണത്തിൽ 85,000 രൂപ ഇതേ കടയില്‍ നിന്നും നഷ്ടപ്പെട്ടിരുന്നു. എന്ത് തന്നെയായാലും ഈ മോഷണത്തെ വൈറലാക്കിയത് കള്ളന്‍റെ ക്ഷമാപണ കത്താണ്.